شجار دارمی مفتوح بین إلطویله و إلقصیره
شچّن حرب مفتوح و إسمع هذیره
بین إلطویله أشعار إو بین إلقصیره
...
خیّه إلطویله أسناد للّی یعزبون
شنهی إلقصیره إرماد بإلدوّه مدفون
...
عوطه إلطویله إتمیل تحثر بإلتراب
إلعیبی إلقصیره إتکون بحضون إلأحباب
...
زمّی إلطویله إتغار ما تحمل إلعار
مثل إلقمر و إتنور ما بین إلقصار
...
إمدحلبه وکت إلشیب عینی إلطویله
لو طخ حملهه إبللیل من هو إلیشیله
...
شبر إبفتر یا طول تدّهرب إحذای
کاس إلطویله إحزام شایلته ویّای
...
عدنه إلجمال أنواع و إنخبّل إلمار
یمشی عوج لو سار و إبحبنه یحتار
...
هه هه إلقصیره إتموت لو تمشی إبطین
إتعاشرنه ویّه إلمای عیشت سلاطین
...
عینی إلطویله إغراب من تحثر إتطیح
مغروره بین إلنّاس ما تستر إتبیح
...
إشگد وکحه من تحچین بالچ تهینین
عینی إلطویله ألماس متعلیه بإلعین
...
یا ذهب یا ألماس زرّافه چنّچ
و إلّی خذاچ إحتار کل ضیمه منّچ
...
عندی إلفشایر عیب عگروگه بإلمای
وصخه إلخذاچ إحتار ما یشرب إلچای
...
أنا إلقصیره أمتاز محبوبه بإلعید
نص ثوبچ أتردّاه ما عندی تردید
...
إیلوگن ثیاب ألوان کلهن علیّه
و إنتی إلسواد إویاچ طایح بلیّه
...
ألتف إبحضن إهوای من یبرد إللیل
و إنتی إلطویله إشلون سیگانچ إتمیل
...
أنا إلأدفّی إهوای من یبرد إحذای
نتحاضن أنا إویاه یتمنّه ویّای
...
مثل إلجبل لو طاح کلّش ثجیله
و إبحضنچ إلمخنوگ یا هو إلیشیله
...
أنا إلقصیره أرتاح ریشه إبحلگ مای
و إلّی شبگنی إو نام یتوسّد إچلای
...
أنا إمن أطر إلسوگ إتصفّگلی إلنّاس
و إلیحمد إلجرذان ما عنده إحساس
...
إلحب لو طویل إحذاچ من یگبل إویاچ
إبنیته تتسمّین و إلشافچ أطراچ
...
گلبچ خبث متروس عینی إلطویله
و إلّی هواچ إحتار کلّش ثجیله
...
بإلناصیه مکتوب خبث إلگصیره
إتخون إلیودهه إبساع من تلگه غیره
...
إمن إلگلت و إلگال خالی گلبنه
و إلعاشرانه إرتاح یشفیله حبنه
...
چنّچ عمد بإلدار و إهطرّه خطّار
و إلضافچ إتحدّاچ ما یطفی إلنّار
...
بإلحرثه و إتزفّین چنّچ حمامه
بس أخشی تنسحگین مثل إلعلامه
...
إنچبّی ولا تحچین عدنه إلفرح دوم
و إلّی لچحنه إیموت إیتابعنه مالوم
...
بإلعالم إو تدرین عالی علمنه
إحنه إلطوال أعزاز عند إلیحبنه
...
إحنه إلنظر بإلعین شکل إلغزاله
و إنتن جمل بإللیل ینکر خیاله
...
شب إلجمال إویای مو إنتی أمیره
بإلطاسه و إتغرگین عینی إلقصیره
...
هم شفتی من تمشین إبرجلچ تخطّین
بیهه إلطویله أطباع تنکر ملایین
...
ثوب إلعرس نیشان من کیفه معلوگ
إو بینه إلعبایه إتلوگ من إنطر إلسوگ
...
عدنه إلحسن معروف ما عدچن إحساس
و إلشعر مثل إلتاج متعلّی بإلراس
...
إحنه إلحسن حفناه لایج علینه
و إلحنّه بیهه إنگوش رگصت بدینه
...
من تمشن إمحدبات مگطوعه إلأنفاس
و إحنه إلننظره إیطیح من نرفع إلراس
...
بل مشی معروفات طوبه إو تدهرب
إو حدر إلطویله إتروح لو یمهه تگرب
...
گصبه إو تطخ و إتطیح شو صرتی بلوه
ثوبچ جمیل إویاچ مو إنتی حلوه
...
أنا إلطویله إحزام للضایج إرماح
و إنتی إلقصیره إضماد ما تنطی للطاح
...
إحنه إلگصار إنجوم و إلخلقه مو عیب
خلّه إلیگول إیگول حطّیته بل جیب
...
أنا إلطویله إلبیت ضاوی إبوجودی
بإلصدگ لو حبّیت أوفی إبوعودی
...
تغرگ إبجدر إلفوح شنهی إلقصیره
تخدمنی تلبس طوگ و أنا إلأمیره
...
کافی کلامچ عیب مغروره چنّچ
إلعاف أهله و إلتبعاچ کل ضیمه منّچ
...
عینی إلطویله إویاچ خرّبتن إبیوت
إلطشّر إلخوّان بمثاله منعوت
...
هه هه إلتزف کل یوم للملّه ختّال
تتعنّن إلسحّار و إتبذلن أموال
...
عادلچن إلمکیاج ساترچن إلخوف
إو من تمشن إمطفیات و إتردمن إبطوف
...
یا مردی مال إغماگ مو للسطوله
مجدافه بإلمشحوف و إمحلیه طوله
...
شوفی إلگصیره إثبات لو مالت إتصیب
لا إنتی مالت عید لا مالت إثغیب
...
لا تشعلین إلنّار بسّچ یدولاب
إحنه إلنحبّه إیهیم یتوسّد إلباب
...
إلیدخل گلبنه إستاد یتسمّی مجنون
و إلّی یعذب إلروح نرمیه بإلعیون
...
بل عگل مجنونات مو بل محبّه
یا ویلی مغرورات کلچن مچبّه
...
إحنه إلنحبّه إیعیش مثل إلملک دوم
إو لو راوداه إلعوز ننزعله إلهدوم
...
إلتابعوچن دوم محّد لگاهم
بس شفنه ملک إلموت یفتر وراهم
...
إحنه إبره و إنتن خیط خیّطنه بیچن
بس شفنه إلثولان تفتر علیچن
...
إبره إنتن إحنه إخیوط جنس إلکلبدون
و إلتابعوچن حول ما ظن یشوفون
...
إحنه إلشمع بإلدار و إحنه إلوشیعه
مثل إلگمر بإلعید بإوّل ربیعه
...
شنهی إلگصیره إحجار بل عبره تغرگ
دوستهه بإلرجلین و إبلحظه تنطگ
...
إحنه إلنجم بإللیل و إحنه إلمسامیر
إلحب إلنه إجناحات بیه نگدر إنطیر
...
مثل إلنخل بإلدار عالی علمنه
متعجبه بینه إلنّاس محّد یذمنه
...
إحنه إلتفگ بإلضیج و إحنه إلشواجیر
نرمی إللذّی بد ذات ما عنده تفسیر
...
إنتن تفگ فتّاک بس یغبض أرواح
إو شدیته عزمی إویاه إو حامیته من صاح
...
إحنه إلگمر و إنجوم و إنتن مراویح
عینی إلطویله إبطین من تمشی إتطیح
...
إحنه إلنحش غمّان و إحنه إلنحط حد
و إلنسل منّه إلیوم من جد إلی جد
...
شنهی إنتن إمعزبات لو وجبه تلفاه
إلیامر علیچن نار و إتگبّن إویاه
...
إحنه إلطوال إسناد ملزومه بإلدار
خطارنه بالاف و إنعزّب إلمار
...
حدبه إبکبرهه إتصیر شوف إلطویله
إتشیّب إبساع إتموت تذهب علیله
...
دبّه إلگصیره إتصیر من تکبر إتفوح
تدّهرب إبکل ریح من تکسل إتنوح
...
مثل إلجمل بإلروض عایف عمامه
و إحنه مشینه إحساب مشی إلحمامه
...
إنمتّر إلگاع إمتار مو نشبر إشبار
بینه إلوصف منعوت ما تاجد إعذار
...
شعر إلگصیره إینور من دگ للحزام
و إلشافه ظل سهران ما یگدر إینام
...
شعر إلطویله إعلام من رفرف إیشیخ
ویلی إلگصیره إتضیع بین إلصلابیخ
...
إلعیبی إلگصیره إتنور لو دخلت إلسوگ
إید إلطویله إمتار متعلمه للبوگ
..
إستمعن یبعد إچلای صار إلحچی إهوای
کل إحنه مخلوقین قبلنهه ویّای
...
شفنه إلطبیعه ألوان مختلفه إلورود
بیض إو حمر خشنات بإلروضه موجود
...
بیض إو سمر وردات منهن طویلات
إیبثّن عطر للنّاس بعیونی حلوات
...
ربنه إلخلقنه أشکال موجود إلإثبات
عدنه إلطویله أجناس إو عدنه إلگصیرات
...
بدر إلطویله إینور إو شمس إلگصیره
و إلیحب حگّه إینوح یکثر سهیره
...
کلچن ذهب طیبات بعیونی وردات
بس إلفتن مو زین إسحگنّه إلفات
...
إتصافن إو کلنه أحباب إلتمّن علیّه
باسنّی بإلوجنات لجل إلهویّه
...
أختم حواری إویاک ما أگدر أنساک
أنت إلگلب و إلروح ظل گلبی یهواک
...
جاسم ثعلبی ألحسّانی 22/09/1401
:: برچسب‌ها:
شجار دارمی مفتوح بین إلطویله و إلقصیره ,
:: بازدید از این مطلب : 1515
|
امتیاز مطلب : 0
|
تعداد امتیازدهندگان : 0
|
مجموع امتیاز : 0
عضو شوید
عضویت سریع
آمار مطالب
آمار بازدید
